تقييم مطعم المدهن

مطعم المدهن

تقييم متميز للمطعم اليمني المدهن تقييمي عن مطعم المدهن للاكلات اليمنيه والحجازيه فرع السلام مول احترنا في الخيارات الكثيره بالمول واخر شي استقرينا اننا نجرب نتعشى في دا المطعم لان شكله نظيف جدا من برا وكمان عليه زحمه ف هذا شي يبشر بالخير  طلباتنا كانت مطبق باللحم اقيمه ٧/١٠ اولا سعره ١٥ ريال مايستاهل لان طعمه جدا عادي فيه احلى منه ومقارنةً بالاماكن الثانيه يعتبر دبل السعر !! مطبق بالدجاج طعمه احلى من اللحم واعطيه٨/١٠  سعره ١٥ ريال سلته للي مايعرفه هيا عباره عن بيض يعملوه بالفخار ويحطه فوقه نوعين جبنه سائله وشيدر اعطيه١٠/١٠ عجبنا كلنا استواء البيض ممتاز والطبق لذيذ ويجي معاه تميس جيد سعره ٢٠ معصوب بالقشطه والعسل مرا عجبني وعجب اهلي القشطه فيها طعم لزيز والعسل خفيف اعطيه ٩/١٠ وسعره ١٥ ريال فول مبخر طعمه رائع جدا اعطيه ٩/١٠ واخر شي الشاي العدني عجب اللي طلبوه واعطوه ٩/١٠ اتوقع سعره ٦ ريال صراحه حبيت الاكل واكيد حكرر الزياره بس في الصباح للفطور وانصح اللي يحبوا الاكلات الشعبيه يجربوه وحيدعولي

 

تقييم مطعم ماليزيا

مطعم ماليزيا

تقييم مطعم ماليزيا ولأول مرة تقييم لمطعم ماليزيا وصلنا من متابعة فضلت عدم ذكر حسابها تقييم لمطعم ماليزيا موقعه شارع التحلية جنب مجمع السوليدير المطعم تابع لشركة ماليزية كان عددنا ستة أشخاص رحنا الساعة ٢:٣٠ الظهر كان قسم العوايل فاضي تماما بعدين جوا ناس ومجموعات لكن كلهم ماليزيين احنا السعوديين الوحيدين طلباتنا طبق روجو يعتبر طبق سلطة عبارة عن قطع تفاح أخضر و أحمر وكمثرى وأناناس وخيار عليه صوص حار لذيذ سعره ب ٢٣ واعطيه ٨ / ١٠ رندن لذيذ جدا جدا يجي معاه طبق رز سعره ٣٠ واعطيه ١٠/١٠ شوربة توم يوم مقاس وسط مقاسها جدا كويس كفتنا الستة وزادت تجي بسخان لحد ما خلصنا باقية ساخنة كان سعرها ب ٥٥ كان فيها كرفس وشرايح بطاطس وطماطم فخربت الطعم اعطيها ٦ / ١٠ ناسي ليماك رز مع لوز وسمك صغير ناشف واجنحة دجاج مقلية ناشفة جدا وصوص حار ما عجبني الطبق فقط الصوص لذيذ سعره ٣٠ واعطيه ٤ / ١٠ طلبنا طبقين ساتي لحم .. الطبق فيه ستة أعواد ومكعبات رز وصوص ، الساتي جدا لذيذ بس يعتبر غالي سعره ب ٤٠ اعطيه ١٠/١٠ طبق اسمه انديانا مي مكرونة بالدجاج والخضار يجي معاها بيضة وحبتين جمبري مشوية الطبق لذيذ سعره ب ٢٥ واعطيه ٩ / ١٠ طبق مكرونة كاري شبيه ل الاسا الماليزية كمية التوفو كتيرة وكور عجين مو طعمه لكن عموما الطبق لذيذ سعره ب ٣٠ و اعطيه ٨ / ١٠ طلبنا سمكة مشوية على الطريقة السنغافورية قال الويتر تاخد وقت حوالي ٤٥ دقيقة فبطلنا منها واخدنا سمكة مقلية عندهم تلات أنواع سمك تختار منها انا ما عجبتني يمكن بسب نوع السمكة لكن أبونا عجبته سعرها ب ٦٥ واعطيها ٦ / ١٠ عصير برتقال طازج اظن حطوه في الخلاط عشان فيه رغوة فصار طعمه ما كأنه فريش سعره ١٨ طلبنا جاك ايس تي ليمون كان بالشاي الأخضر سعره ٣٥ وطعمه كويس الحساب كله ٣٩١ السلبيات تقديم الطلبات كان من غير ترتيب جابوا الأطباق الرئيسية أول وبعدين الشوربة والساتي والروجو والسمكة لما جينا نخلص جابوها يعني نفس وقت المشوية لو اخدناها الغريب انه مطعم ماليزي وما عنده دندن الويترز ما في غير شخص واحد ومو موجود في صالة الطعام عموما المطعم لذيذ وشبيه بمطعم شابتر اللي كان في مجمع العرب وبإذن الله راح اكرر الزيارة

 

تقييم مطعم بيت المكرونة

مطعم بيت المكرونة

تقييم مطعم بيت المكرونة مكرونة بالباشميل وعليها جبنة ذايبه ..والطعم ولا أروع ..تقييم لبيت المكرونة  السلام عليكم . تقيمي لمطعم بيت المكرونة حي الوزيرية وله فرعين كمان واحد في شارع الاربعين بحي الصفا والثاني في شارع حراء اتوقع . . نجي في المهم.. طلباتنا كانت: ١- صحن صغير مكرونة بشاميل بالدجاج و عليها طبقة جبنة اضافية لذيذة لوحدها بدون صوص بس احسها ساهية شوية يمكن لاني احب المفلفل بس مع الصوص حقهم  مرة طعمممة اعطيها ٨/١٠ لاني احس ناقصها ملح وبهارات، تقريباً سعرها ١٣ ريال ٢- صحن مكرونة بشاميل بالروبيان ونفس الشي طلبنا طبقة جبنة عالوجه انا ماذقتها بس اللي طلبها مررررة يمدحها  ويعطيها ١٠/١٠ سعرها ما اتذكره بس في حدود ال١٧ ريال ٣- البطاطس المقلية مرررررة طعممةةةة مقرمشة من برا وطرية من جواا وسعرها ٥ ريال والكمية كبيرة ماشالله اعطيها ٩/١٠ نجي للصوص حقهم لا تفكر تروح المطعم ذا بدون ما تاخذ من الصوص لانه هوا السر بالنسبة ليا  وكمان احسن شي تاكل الاصناف وهيا حارة والاجبان اللي فيها تكون ذايبة شي خيالي . المجموع مع ٢ موية و ٢ مشروب غازي ب ٤٥ ريال. المطعم نظيف وكمية الاكل مناسبة جداً و الاسعار حلوة في متناول الجميع والمواقف متوفرة والخدمة سريعة نوعاً ما وفيه قسم شباب بسس مافيه عوائل. وشكراً

 

تقييم مطعم كويزين حلواني

مطعم كويزين حلواني

تقييم متميز للمطعم اللبناني كوزين حلواني  تجربتنا لمطعم كوزين حلواني ماعرف الوصف بالضبط بس انو بعد  مركز العون نخش في التقيم  واول مره اقيم هنا ع فكرهه . .  طلباتنا كانت : بطاطس مقليه: شبهه مشبعه زيت م عجبتني٧/١٠ سعرها اعتقد ١٨او ١٦ مادكر وكبه مقليه : طعمه وكبيره وخفيفه اديها ٩/١٠ مافتكر سعرها .  طبق مشاوي مشكله : طعم وخفيف بس الكميه تكفي شخصين والسعر غالي شوي حاجه وسبعين وطريقه التقديم حلوه زي مانتو شايفين ٩/١٠ وشسمو كمان طلبنا صحن دجاج بالكريمه: ماعجببببني ابدا الكريمه قشطه ابدا مو كريمه  فيها طعم غريب ماحبيتو يجي معاه رز ابيض كميه جدا قليله ع قوله ستي ع الريحهه!! اديلو ٥/١٠ طلبنا رز ابيض صحن صغير مقابل سعرو العالي ب١٨  واحد تاني رز ابيض بشعريه  يمشي حال معجننن اديهم ٦/١٠ . مكرونه باشميل بالدجاج:  يعني انا تحمست لها بس خابت امالي الحقيقه انو فيه طبقه زيت مزعجه  ودا الشي ماحبيتو طلبنانط منو اتنين وم كملناها اديها ٥/١٠ طلبنا العصيرات انناس /وليمون نعناع /وشمام كويسين مابهم شي . المطعم كديزان جميل وحلو ويحمس بس الاكل مرررا ماعجبني ماعتقد برجعلو تاني في مطاعم مشاوي اخسن منو بكتير النظافه مو ذاك الزود لانو الحمام الله يكرم القارئين كان معدوم وبس والله

 

تقييم مطعم القرية

مطعم القرية

تقييم لفطور مطعم القرية تقييمي لمطعم القرية بحي قويزة شارع جاك بجوار صراف الراجحي . طلبي كان عريكه طبقات واعطيها ٩/١٠ فول عادي ٧/١٠ بيض مع الجبن ع الحجر (لحسه) ٩/١٠ ٢ شاي عدني ٨/١٠ ٢ مويه قبل كذا طلبت فول قلابه بالحجر كان جدا ممتاز واعطيه ١٠/١٠ وان شاء الله حكرر زيارتي له مطعم جميل يستحق التجربة الحساب كان كله ٢٨ ريال الاسعار ممتازة

 

تقييم مطعم باب الهند

مطعم باب الهند

تقييم متميز لمطعم باب الهند   قررنا نتعشى برا كل مادخلنا مطعم قالوا مخلصين  قلت لكم مالكم الا الهندي ع الطريق ولا بنأكل فول وتميس   تهدد  مطعم باب الهند مطعم شعبي صغير ديكوره بسيط  متواضع الدور الأرضي للشباب والدور الثاني عوائل بحي الشرفية مقابل السفارة الإيطالية جينا ع الساعة ١٢ ونص بالليل اول ما دخلنا سألونا كم عددكم وجهزوا لنا طاولة وطلبنا بارتشن ، وجابوا لنا ضيافة الشئ اللي فوق بالصورة ليمون + صوص لبن بالنعناع + ومخلل ليمون + خبز زي الكربوك بس مو كربوك فيه منه حار وعادي ماحبيناه صراحة  كان عددنا ٥ أشخاص نجي للطلبات ٢ بتر شيكن : لذيذ لذيذ ب٤٤ ريال  اعطيه ٩/١٠ ١ موتون روقانجوش اسمه كذا عبارة عن ايدام باللحم هوا مدحه لنا  : ب٢٤ ريال كان لا بأس اعطيه ٦/١٠ ٢ دجاج ٦٥ هذا المتعارف عندي بس كاتبينه في المنيو دجاج ٨٨  ب٤٠ ريال المهم انه دممممار لايفوتكم  ١٠/١٠ ٨ خبز نان بالزبدة حلو بس صغير ب٢٤ ريال يعني الحبة ب٣ ريال  اعطيه ٧/١٠ عشان السعر مبالغين فيه ١ رز برياني طعمه جيد ب١٠ ريال اعطيه ٨/١٠ ٣ سڤن أب ٦ ريال ، ٢ موية صحة ريالين المجموع كله ١٥٠ ريال والكمية اللي بالصحن جييييدة  وطبعا لنا زيارات قادمة اكييييد

 

تقييم مطعم بيتوتي

مطعم بيتوتي

تقييم لمطعم بيتوتي تجربتنآ اليوم كانت لمطعم بيتوتي فرع الحرمين خلف مانويل .. المطعم دورين تحت شباب فوق عوائل ، اللي يستقبلو الزبائن والطلبات شباب سعودين  أخذنا الطلبات سفري ماجلسنا في المطعم طلباتنا كانت : _ ٣ صحون كور الجمبري الصحن فيه حبتين ب ١٠ ريال أعطيها ٧ من ١٠ مو مره عجبتني مشبعه ب الزيت _ ٣ صحون رز صيني بالخضار الواحد ب١٤ ريال السعر مناسب لحجم الصحن وكميته أعطيه ٩ من ١٠ لذيذ _ ١ مكرونه صينيه ب ١٥ ريال أعطيها ٩ من ١٠ _ ١ دجاج الكندو ب ٣٠ ريال عباره عن قطع دجاج عليها صوص واضح حداقة الكاتشاب الأندونيسي في الطعم وعليه سمسم لذيذ بس الصحن على سعرو صغير أعطيه ٩ ونص من ١٠ _ ١ لحم سيشوان ب ٤٠ ريال عباره عن لحم ناشف وعليه شويه فلفل وبصل أعطيه ٩ من ١٠ _١ جمبري معا الكاجو ب ٤٥ريال  ايدام جمبري وخضار وكاجو الصوص مو مره عجبني أعطيه ٨ من ١٠ _ ١ جمبري بالثوم والصوص الحار ب ٤٣ ريال  لذيذ والصوص والحراره مناسبه أعطيه ٩ من ١٠ الحساب كان ٢٤٧ ريال ، جودة الأكل ممتازه النظافه كويسه الطلب استغرق ٢٠ دقيقه ، أول تجربه وليس الأخيره بإذن الله ودمتم سالمين

 

تقييم مطعم ست زمرد

مطعم ست زمرد

تقييم للمطعم المصري ست زمرد  غدانا في ست زمرد فبداية ممشى شارع فلسطين باتجاه البحر المكان نظيف و مرتب و في بارتشن و المكان مشمس و شبابيكه كبيرة  و شرحة و التكييف ممتاز و في مصعد لقسم العوائل بصراحة مفيد للي عنده اطفال في عربياتهم او للعوائل الي يخرجوا مع كبار السن طلباتنا لشخصين كانت: شوربة حريرة لذيذة وحادقة ومفلفلة مع انها مو تخصصهم اعطيها٩ /١٠سعرها ٢٥ ريال رز معمر بالدجاج أول مرة أدوقه و حبيته صراحة  ٩/١٠ … ب٣٣ ريال مشاوي ست زمرد تكفي من ٢-٣ أشخاص (كفتة،شيش طاووق،أوصال،طرب،ريش) وصلتنا حارة و مبهرة و أطعم شي فيها الكفتة أعطيها ٩/١٠ ب ١٩٠ ريال أم علي لذيذة ٨.٥ /١٠ …. ٢٠ ريال ٢ سفن اب الواحد ٥ ريال توتال ٢٧٨ريال الويتر لطفاء و خدمتهم كويسة، ان شالله نجرر التجربة بطلبات تانية

 

تقييم مطعم سلة السندوتشات

مطعم سلة السندوتشات

تقييم مطعم سلة السندوتشات المكان فكرته حلوة كافتريا صغيرة تقدم ساندوتشات ولكن في مكان عصري وجميل  ونظيف ..تقييم لمطعم سلة الساندوتشات تقيمي اليوم لمطعم اسمه ساندوتش باسكيت المحل في شارع حائل خلف متاجر مرحبا مباشرة  المحل مصمم بديكور عصري وحديث وفيلو جلسات داخليه وخارجيه اكتر مايميز المطعم انه نفس نظام البوفيه ولكن بشكل نظيييف وعصري وهو الي شجعني لتجربته طلباتنا كالتالي ساندوتش طعميه8/10 والسعر 3 ريال  خفيف ونضيف ساندوتش شيش طاووق 8/10 والسعر 5 ريال الدجاج طري والخبز طري ساندوتش تونه 7/10 عادي طريقتهم انه كل شي قدامك وانت تختار الاضافات بالنسبه للعصيرات ليمون بالنعناع نسيت اقله حط ثلج فكان بالنسبالي عادي لو بالثلج ميه ميه  وسعره 4 ريال

 

تقييم مطعم كوك شوب

مطعم كوك شوب

تقييم لفطور مطعم كوك شوب قونايدن  اليوم تقريري لمطعم جدا جميل ورايق مطعم _ كوك شوب _ في التحليه بمجمع كاتشب وصلت المحل وكان فيه 3 طاولات مليانه بس والباقي فاضي استقبلونا ودخلونا ع طاولتنا كنا 3 اشخاص وطلباتنا: اومليت ميكس بالبطاطس والهوت دوق والجبنه لذيذه 8/10 م حسيت بطعم الجبنه ابدا وماجابو لنا الخبز الا لما احنا طلبناه وهو المفروض يجي مع الطلب اصابع الموزريلا لذيذه وخفيفه مافيها زيت كثير 10/9 عيش باللحم هذا الطلب خلصنا البيض واصابع الجبنه والشاهي وبعدين جابووه تاخرو مرا طبعا منظره شووي حايس ليمون وطماطم وجرجير حوسه كذا بس الطعم ي سسسسلام مرا لذذييييذه 10/9 3 شاهي تركي مررره لذيذ وفعلا يذكرك بـ شاهي تركيا الاصلي 10/9 الحساب كان 141 ريال المطعم جميل ورايق وديكوراته مرتبه وتحسسك بالاستايل الريفي المرتب الجو العام 10/10 الاسعار 10/10 الاكل والنظافه والترتيب 10/10 ولاتنسو لولا اختلاف الاذواق لـ بارت السلع